شوال کا مہینہ تھا، مولانا سے میری پہلی ملاقات اپنے ددّا  (والد) کے ہمراہ مسجد کے وضو خانہ پر ہوئی ، میرے ددّا نے فضیل کے نانا کا حوالہ دیا، مولانا کہنے لگے بس گاؤں کا نام ہی کافی ہے، سب کٹیا والے میرے سالے ہیں ، پھر میری طرف مخاطب ہوکے بولے “آج سے میں تمہارا ڈبلیکیٹ باپ ہوں” مولانا کے مزاج میں بڑا بالغ مزاح تھا، دیہی جملے بول کر بات میں مزاح پیدا کرتے، ہمیشہ بولتے تھے “ جتنے کالے سب باپ کے سالے” فارسی کہاوت “    ہم چوں ما دیگرے نیست “ کی جگہ “ ڈنگرے نیست” بولتے تھے، جو ان کے منہ سے بہت بھلا معلوم ہوتا تھا، حضرت مولانا کی علمی استعداد ، افہام و تفہیم ، تنظیمی صلاحیتیں ، بلا کی معاملہ فہمی ، مزاج کی سادگی، طلباء کی حوصلہ افزائی ، ان سے محبت ، ادارہ کے تئیں اخلاص ، عصری علوم سے آگاہی، خاص کر ہندی / سنسکرت الفاظ اور ریاضی پر دسترس تھی،گھر میں بچوں کے ساتھ بڑا دوستانہ ماحول تھا۔

مولانا کو انیس سے بہت گہرا لگاؤ تھا، فارسی کا یہ شعر  :” من نہ آنستم کہ روز جنگ بینی پشت من ۔آں منم کاندرمیان خاک و خوں بینی سرے”

پڑھکر بڑے پر امید نظر آتے تھے ، سیکڑوں فارسی کے اشعار یاد تھے، گلستاں ، بوستاں تو حفظ تھیں ، ہم نے اور فضیل نے مولانا سے باقاعدہ فارسی پڑھی ، چہارم اور پنجم کی جماعتوں کے درمیان پندرہ منٹ کا وقفہ ملتا تھا، اسی وقفہ میں فارسی کا دو سالہ کورس چند مہینوں میں مکمل کرا دیا، بس پندرہ منٹ پڑھکر ہم اور فضیل قلعہ کا رخ کرتے ،  قلعہ ان دنوں کرکٹ کا لاڈس ( مکہ) تھا، قلعہ کے آف سائڈ میں ایک دیوار تھی ، جس پر happy لکھا ہوا تھا، میں نے اس کو ہپو پڑھا ، ان دنوں قلعہ پر ہپو نامی کرکٹر کا بہت چرچا تھا، میں نے سمجھا اسی کا نام لکھا ہوگا، فضیل بولا “ ہپو نہیں ہپی ہے” ہم دونوں میں بہت تکرار ہوئی، آخر فیصلہ مولانا کے پاس پہنچا ، بولے “ نہ ہپو ہے اور نہ ہپی بلکہ ہیپی ہے، سسرو دونوں غلط ہو، اس طرح مولانا نے ہمارے درمیان مصالحت کی، بعد میں جب انگلش کی کچھ شد بد ہوئی تو پتا چلا کہ فضیل صحیح تھا، بس مولانا نے ایک بیچ کا راستہ نکال دیا تھا، “ پیدا کہاں ہیں ایسے پراگندہ طبع لوگ”

سال ختم ہونے پر جب ہم دونوں فارسی کا امتحان دینے بڑے مولی صاحب کے پاس گئے، تو انہوں نے ایک پرچہ لکھ کر فضیل کو پکڑا دیا “ ہردو طالب علم کو سال اوّل میں داخلہ دیا جائے” پھر باقاعدہ دفتر میں آکر سب اساتذہ کے سامنے مولانا کی بہت تعریف کی کہ “ اس طرح فارسی پڑھائی جاتی ہے” ، مولانا کے درس و تدریس کے سبھی قائل تھے، میں نے ادارہ سے لیکر دارلعلوم ( وقف) تک بہت سے اساتذہ سے استفادہ کیا، مگر اس قدر خوبصورت افہام و تفہیم کسی میں نہیں پائی، صلاحیت سے الگ افہام و تفہیم باقاعدہ ایک زیورِ فن ہے ، جس سے مولانا غایت درجہ آراستہ تھے،

ادارہ میں تین سال گزارے ، صرف ایک مرتبہ اسٹیج پر تقریر کرتے دیکھا، فیضان کے گھر کے بائیں طرف مقابل میں ایک گلی ہے اس میں تھوڑا  سا آگے بڑھو ، گھروں کے درمیان تقریباً دو سو گز جگہ ہے، وہاں ایک چھوٹا سا اجتماع تھا جس میں مولانا نے تقریر کی تھی، تقریر میں بڑی سادگی تھی، وہی درس والا انداز ، غیر لچھے دار،  عام بول چال کی غیر مترادف لفظیات، چیخ پکار سے مبرا، اتار چڑھاؤ سے بے نیاز ، ایسا نہیں کہ مولانا کے پاس لفظیات کی کمی تھی، جو شخص اتنی اچھی فارسی جانتا ہو، اس کے پاس لفظیات و تراکیب کی کمی ہوہی نہیں سکتی، مگر مولانا کے مزاج میں خواجگی نام کی کوئی چیز نہیں تھی، کبھی مولانا کو ایسا کرتا پہنے نہیں دیکھا جس کا دامن ٹخنوں سے باتیں کررہا ہو، اور نہ ایسا پائجامہ جو گھٹنوں کی طرف گھور رہا ہو، کرتا گھٹنے سے دو یاتین انچ فزوں تر اور پائجامہ ٹخنے سے محض آدھا انچ فراز، داڑھی کو بہت سلیقے سے سنوار کر بالکل گول رکھتے تھے، کسی سرکش بال نے گولائی بھنگ کرنے کی کوشش کی تو وہ انجام کو پہنچا، درمیانہ قد ، چال میں شریفانہ رچاؤ، پیٹ کا نام و نشان تک نہیں تھا، سرتا پیر متوازن ، بہت طاقتورتھے، ایک دو بار پیٹھ پر بایاں ہاتھ کھایا ہے، ذرا زور سے پڑ گیا تھا، یقین مانو بالکل ٹیڑھا ہوگیا، لاٹھی چلانا بہت اچھے سے جانتے تھے،۔

ہم طلباء ڈر سے زیادہ عزت کرتے تھے، مدارس میں سوال کرنا اور اساتذہ کے سامنے بغیر زبان لڑکھڑائے بولنا بے ادبی سمجھا جاتا ہے، مگر حیرت یہ کہ مولانا کے سامنے دارلاقامہ کے سبھی لڑکے بولتے تھے اپنی بات رکھتے تھے، ہم لوگ سوال کرتے تھے، وہ خندہ پیشانی سے سنتے اور جواب دیتے تھے، کئی لڑکوں کی بہت “ بجھی” لگاتے، جب مسجد میں فجر کے بعد حاضری لیتے تو شکیل کھانڈے پور کا جیسے ہی نام آتا “ کھانڈے “ کا تلفظ منہ بھر کرکے خود بہت زور سے ہنستے اور پوچھتے “کل قہاں  تھے” شکیل جواب دیتا” عبد السلام حافج جی کے گیہوں پسانے گئے تھے” مولانا کہتے “ ڈیلو منہ پھیلو “ ہم سب بھی زور سے ہنس دیتے، جب ناصر ، انصار ، عبدالہادی نودیا معین ، فاروق اور معین الدین کا نام آتا تو اسی طرح کا گدگدا ماحول ہوجاتا ، اور جب مدثر رسول پوری کا نام آتا تو کہتے “ یہ سسرا پڑا سو رہا ہوگا” منہ نچوے کا زمانہ تھا، بس لڑکے چھت پر لیٹے تھے کہ فاروق نے اپنی لحنِ داؤد میں رونا شروع کردیا، ( فاروق ناک سے بولتا/روتا/ قرات کرتا تھا، )ہم سب پہلے سے ہی ڈرے ہوئے تھے، اور ڈر گئے ایک قسم کی بھگدڑ مچ گئی، مولانا بنیان اور چوخانہ دار سفید لنگی پہنے ہاتھ میں لاٹھی لیکے آئے ، سب کو چپ کیا، ادھر ادھر دیکھا ، پتا چلا دو بلی لڑگئیں تھیں، فاروق کی بہت بجھی لگائی، اور یہ کہتے ہوئے چلے گئے کہ ہم بیٹھک کی کھڑکی سے دیکھ رہے ہیں، ابھی ایک ہی گھنٹہ گزرا کہ سب نیچے چیخنے لگے، مولانا پھر آگئے ۔۔۔۔ جنید سنسار پوری جو اکثر فجر کی نماز بھی پڑھاتا تھا کہنے لگا میں نے ابھی لکڑیوں پر منہ نچوا اترتے دیکھا ہے، ادھر اسلام الدین بولے کہ میری طرف چھپٹا بھی تھا، اب ہم سب ڈرے سہمے کھڑے تھے، مولانا نے کہا “ دکھاؤ کہاں ہے ؟؟؟ وہ دور سے لکڑیوں کی طرف اشارہ کررہا ہے، جی وہاں “ مولانا وہاں گئے ، دیکھا، دو چار لکڑیا ہٹائیں، وہاں ایک جگنو چمک رہا ہے، مولانا نے جنید اور اسلام الدین کو پاس بلا کرکافی  کھنچائی کی، اور بہت رات تک ہم سب کو ہنساتے رہے، موصوف بآسانی طلباء کے معاملات حل کرنے کی صلاحیت رکھتے تھے، کیونک وہ طلباء کی نفسیات سے بہت اچھی طرح سے واقف تھے،۔ حبِ مال و جاہ سے ایک طرح کی بے فکری، بہت تھوڑی سی محض تنخواہ پر نہ صرف گھر چلایا بلکہ سبھی بچے پڑھے بھی، یقیناً کئی بار پریشانیاں بھی آئی ہونگی، نمود و نمائش سے پاک “ نہ ستائش کی تمنا نہ صلہ کی پروا” بس اپنے کام سے کام، قلندرانہ صفت کے حامل سیدھے سادے مخلص انسان، ۔

اپریل  کے مہینہ کا آخری ہفتہ تھا، ہم دونوں میسور سے آئے ہوئے تھے، میں فضیل سے ملنے محمدی گیا، یہاں مولانا سے میری آخری ملاقات تھی ، ساتھ کھانا کھایا، بہت ساری ہنسی مزاق کی باتیں ہوئیں، مجھے دو دن بعد میسور جانا تھا جب کہ فضیل کو دہلی میں جماعتِ اسلامی کی ایک ورکشاپ اٹینڈ کرنی تھی، میں میسور فضیل سے پہلے آگیا، تقریباً دس دنوں کے بعد فضیل میسور پہنچا، ٹکٹ ری گریٹ ہونے کی وجہ سے فضیل نے میسور تک جنرل بوگی سے سفر کیا تھا، یہ میسور اس وقت پہنچا جب ہم روم لاک کرکے فجر کی نماز پڑھانے گئے ہوئے ، فضیل ہاسٹل کی مسجد میں امام تھا اس کی عدم موجودگی میں نماز میرے ذمہ تھی، اس نے اپنا سامان واچمیں( ماموں ) کے روم میں رکھا اور وہیں آرام کرنے لگا، میں نماز سے فارغ ہوکر جب نکلا تو ماموں نے خبر دی کہ “ فضل آگیا ہے ، اور میرے روم میں سورہا ہے” وہ فضیل کو ہمیشہ فضل کہتا تھا، میں روم کی طرف تیزی سے بڑھا ابھی کچھ قدم ہی چلا ہونگا کہ اچانگ تابش کا فون آگیا “ مولانا کا انتقال ہوگیا ہے اور فضیل کو مت بتانا” میرے پیروں تلے سے زمین نکل گئی ، سر چکرا رہا تھا اعصاب شل ہوئے جا رہے تھے میں نے پاس کھڑے ایک ناریل کے پیڑ کا سہارا لیا اور  بیٹھ گیا، تھوڑی دیر تک یوں ہی ساکت و صامت بیٹھا رہا، تبھی جنید کا فون آگیا کہ فضیل کو موت کے بجائے سخت علالت بول کر گھر بھیج دو، میں اٹھ گھڑا ہوا، میرے اداس ذہن میں کئی سوالات متصادم تھے، ایک کشمکش تھی، فضیل سے کس طرح جھوٹ بولونگا ؟؟ کیا میں اپنے چہرے کے تآثرات چھپا سکوںگا؟؟ اگر سچ اس پر ظاہر ہوگیا تو اس پر کیا گزرے گی ؟؟؟ فضیل تک بیس قدم کا وقفہ طے کرنا میرے لئے کسی حشر سامانی سے  کم نہیں تھا۔۔۔۔۔